ព័ត៌រមានលំអិត ជុំវិញការផ្ទុះអាវុធពេលបង្ក្រាបឈើជិតព្រំដែនវៀតណាមបណ្តាលឲ្យមនុស្សបីនាក់បាត់បង់ជីវិត
ភ្នំពេញៈ មន្ត្រីបរិស្ថាន ប៉េអឹម និងមន្ត្រីអង្គការសរុបចំនួនបីនាក់ បានប៉ះទង្គិចគ្នាជាមួយក្រុមរកស៊ីឈើ ស្ថិតនៅដែនជម្រកសត្វព្រៃកែវសីមា ខេត្តមណ្ឌលគិរី ជិតព្រំដែនវៀតណាម នៅល្ងាចថ្ងៃទី៣០ ខែមករា។
មន្ត្រីជាន់ខ្ពស់ក្រសួងបរិស្ថាន បានប្រាប់រស្មីកម្ពុជាឲ្យដឹងថា កាលពីល្ងាចថ្ងៃទី៣០ ខែមករា មានករណីផ្ទុះអាវុធនៅចំណុចព្រំដែនផ្លូវទៅកាន់ប៉ុស្តិ៍ដាក់ឡែ ស្ថិតក្នុងដែនជម្រក សត្វព្រៃកែវសីមា ខេត្តមណ្ឌលគិរី បណ្ដាលឲ្យមនុស្សបីនាក់បាត់បង់ជីវិត (ស្លាប់២នាក់នៅក្នុងព្រៃ និងបញ្ជូនមកដល់មន្ទីរពេទ្យខេត្តស្លាប់ម្នាក់)។
ជនរងគ្រោះដែលស្លាប់ឈ្មោះ ១.តឿន សុខណៃ ជាមន្ត្រីឧទ្យានុរក្សដែនជម្រកសត្វព្រៃកែវសីមា ប្រចាំនៅស្នាក់ការអូររាំង, ២.ឈ្មោះសេក វឌ្ឍនា ជាមន្ត្រីកងរាជអាវុធហត្ថលើផ្ទៃប្រទេសដែលរួមសហការ និង៣.ឈ្មោះធួន ខ្នារ ជាមន្ត្រីអង្គការ WCS ផ្នែកផែនទី (GPS)។
តាមសេចក្តីរាយការណ៍ពីក្រុមការងារមន្ទីរបរិស្ថានដែលចុះទៅយកសាកសពបានប្រាប់ថា ពុំទាន់ដឹងអំពីមូលហេតុនៃការផ្ទុះអាវុធនេះនៅឡើយទេ គ្រាន់តែជាការសន្និដ្ឋានបឋមថា ជាករណីទប់ស្កាត់ការកាប់ឈើខុសច្បាប់នៅព្រំដែនក្បែរតំបន់អូរហ៊ុច។
បច្ចុប្បន្នសពមន្ត្រីអង្គការ WCS ត្រូវបានអង្គការ WCS រៀបចំចាត់ចែងដើម្បីធ្វើបុណ្យតាមប្រពៃណី។ រីឯមន្ត្រីឧទ្យានុរក្ស និងមន្ត្រីអាវុធហត្ថលើផ្ទៃប្រទេស ក្រុមការងារមន្ទីរបរិស្ថានបាននិងកំពុងចូលទៅយកសាកសព។
លោក ស្រ៊ុន ដារិទ្ធ ទីប្រឹក្សាក្រសួងបរិស្ថាន និងជានាយករងខុទ្ទកាល័យ បានបញ្ជាក់ប្រាប់រស្មីកម្ពុជាថា “កម្លាំងបរិស្ថានម្នាក់សហការជាមួយកម្លាំងប៉អឹម និងបុគ្គលិកអង្គការចុះទៅល្បាត ហើយក៏ប្រទះឃើញបទល្មើស ហើយក៏យើងបង្ក្រាបបទល្មើសនឹង ដកឃ្លាចេញមកវិញ ដោយសារកម្លាំងយើងតិច ត្រូវការអន្តរាគមន៍ ហើយដកឃ្លាបានបន្តិច ក៏មានការបាញ់ប្រហារមកលើកម្លាំងធ្វើអោយស្លាប់បៅនឹងកន្លែងពីរនាក់ហើយរបួសម្នាក់ដឹកមកតាមផ្លូវក៏ស្លាប់ សរុបស្លាប់ទាំង៣នាក់”។
លោកបញ្ជាក់ទៀតថា “យើងមិនទាន់បានព័ត៌មានលំអិតថា មកពីមូលហេតុអ្វីជាក់ស្តែង អ្នកណាជាអ្នកបង្កក៏មិនទាន់ដឹងនៅឡើយ កំពុងស្ថិតក្នុងការស៊ើបអង្កេតនៅឡើយ”។
លោកឧត្តមសេនីយ៍ត្រី អេង ហ៊ី អ្នកនាំពាក្យប៉េអឹមលើផ្ទៃប្រទេស បានអោយដឹងថា “ទាក់ទងករណីនេះ នៅមិនទាន់ដឹងថា ជាករណីអ្វីនៅឡើយទេ គឺយើងកំពុងតែស្រាវជ្រាវ។ តែជាការអនុវត្តលោកនាយឧត្តមសេនីយ៍ សៅ សុខា មេបញ្ជសការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ គឺបានអោយក្រុមការងារថ្នាក់ជាតិ គឺមានកម្លាំងចម្រុះដែលមាននគរបាលជាតិ បរិស្ថាន រដ្ឋបាលព្រៃឈើ នឹងចុះទៅកន្លែងកើតហេតុនៅថ្ងៃទី៣១ ខែមករា ដើម្បីស្រាវជ្រាវអោយបានច្បាស់”៕
No comments:
Post a Comment