រថយន្តដឹកដីមួយគ្រឿង កិនគ្រាប់៦០មិល្លីម៉ែត្រ គៀបជាប់កង់ សំណាងល្អមិនផ្ទុះ
សៀមរាប ៖ រថយន្តដឹកដី ១គ្រឿង បើកកិនគ្រាប់មិនទាន់ផ្ទុះ ១គ្រាប់គៀបជាប់ នឹងកង់រថយន្ត ពេលដឹកដីចូលក្រុងសៀមរាប កាលពីថ្ងៃទី៣១ ខែមករា ឆ្នាំ២០១៨ ក្នុងភូមិភ្ញាជ័យ សង្កាត់ស្វាយដង្គំ ក្រុង.ខេត្តសៀមរាប ។
សមត្ថកិច្ច នគរបាលសង្កាត់ ស្វាយដង្គំ បានឲ្យដឹងថា ម្ចាស់រថយន្តដឹកដីឈ្មោះ នេត កុម្ភៈ ភេទប្រុស អាយុ ៣០ឆ្នាំ ជាអ្នករស់នៅក្នុងភូមិភ្ញាជ័យ សង្កាត់ស្វាយដង្គំ បានដឹកដីពីកន្លែង រណ្តៅដីរបស់យាយហ្គិច ក្នុងភូមិថ្នល់ ឃុំរុនតាឯក ស្រុកបន្ទាយស្រី ហើយបានដឹកយកមកលក់នៅក្រុងសៀមរាប ។ បន្ទាប់ពីម្ចាស់រថយន្តយកដីចាក់ រួចយកឡាន មកជួសជុលនៅយាន្តដ្ឋាន ១កន្លែង នៅសង្កាត់ស្វាយដង្គំ ក៏ប្រទះឃើញគ្រាប់មីនប្រភេទ ៦០មីលីម៉ែត្រ ចំនួន ១គ្រាប់ គៀបជាប់ប្រឡោះកង់រថយន្ត ពេលនោះ ក៏ភ័យស្លន់ស្លោហៅសមត្ថកិច្ចឲ្យជួយអន្តរាគមន៍ភ្លាមៗ តែម្ដង។
លោកបន្ថែមថា បន្ទាប់ពីសមត្ថកិច្ចទៅដល់ ក៏បានរាយការណ៍ទៅស៊ីម៉ាក់ មកដោះ ដើម្បីយកទៅកម្ទេចចោល ។ មន្ត្រីជំនាញបានអះអាងថា នេះគឺជាសំណាងរបស់ម្ចាស់រថយន្តណាស់ដែលមិនកិនចំ ព្រោះអីគ្រាប់នេះ អាចមានលទ្ធភាពផ្ទុះបាន ហើយគ្រាប់មីននេះ ផលិតនៅសហរដ្ឋអាមេរិក ៕
No comments:
Post a Comment