ឈប់ម៉ូតូអត់ដកសោ មានអីចោរឡើងជិះរត់បាត់
ខេត្តកំពង់ធំ៖ ករណីចោរលួចម៉ូតូមួយបង្កឲ្យមានការភ្ញាក់ផ្អើលកាលពីព្រឹកថ្ងៃទី៣១
ខែមករា ឆ្នាំ២០១៨ នៅភូមិឥន្ទកុមារ ឃុំកំពង់ស្វាយ ស្រុកកំពង់ស្វាយ
ខេត្តកំពង់ធំ ។
ពាក់ព័ន្ធករណីខាងលើនេះលោកវរសេនីយ៍ឯក ខេន ឈុនគ័រ
អធិការនគរបាលស្រុកកំពង់ស្វាយ បានប្រាប់កោះសន្តិភាពឲ្យដឹងថា
នៅព្រឹកថ្ងៃកើតហេតុខាងលើ ជនរងគ្រោះដែលជាម្ចាស់ម៉ូតូឈ្មោះ ហ៊ុយ
ប៊ុនថន ភេទប្រុស អាយុ៤៣ឆ្នាំ នៅភូមិឃុំខាងលើ ម៉ាកឌ្រីមC១២៥
ពណ៌ខ្មៅស៊េរី២០១៥ ពាក់ស្លាកលេខ កំពង់ធំ ១G-៣៩៧៨
ទុកចោលនៅពីមុខផ្ទះរបស់ខ្លួន ដោយមិនបានដកយកកូនសោទេ
រួចក៏ដើរចូលទៅយកកូននៅក្នុងផ្ទះ
ខណៈនោះចោរម្នាក់ឃើញឱកាសល្អក៏ឡើងជិះម៉ូតូរត់គេច
តែត្រូវម្ចាស់ឃើញទាន់ស្រែកថាចោរៗ។
ភ្លាមៗនោះ កម្លាំងសមត្ថកិច្ច
និងប្រជាពលរដ្ឋបាននាំគ្នាជិះម៉ូតូដេញតាមពីក្រោយ
ជនសង្ស័យជាចោរលួចនោះភ័យពេកក៏ជិះម៉ូតូដួលនៅចំណុចផ្លូវបំបែកផ្សារថ្នល់បែក
ក្នុងភូមិថ្នល់បែក ឃុំត្រពាំងឫស្សី ស្រុកកំពង់ស្វាយ
ហើយក៏ឃាត់ខ្លួនបានភ្លាមៗ ដោយមានរបួស
ក៏នាំយកទៅព្យាបាលនៅពេទ្យខេត្តកំពង់ធំ។
ជនសង្ស័យជាចោរលួចម៉ូតូនោះឈ្មោះ ខូវ ខន ភេទប្រុស អាយុ៣៣ឆ្នាំ
រស់នៅភូមិល្វា ឃុំសំព្រោច ស្រុកស្ទោង ខេត្តកំពង់ធំ
ករណីនេះសមត្ថកិច្ចជំនាញកំពុងបំពេញសំណុំរឿងតាមនីតិវិធ។
No comments:
Post a Comment