កែវ រំចង់ថាទម្រាំភរិយាឆ្លងទន្លេរួច អាចសន្សំលុយវ៉ៃបាន ២-៣ ប្រកួតទៀតដែរ

ជើងខ្លាំងជួរមុខរបស់ប្រទេសកម្ពុជាមកពីខេត្តបាត់ដំបង កែវ រំចង់ ថា ភរិយារបស់ខ្លួនពេលនេះពពោះបានជាង៧ខែមកហើយ ដូចនេះទម្រាំដល់ពេលសម្រាលអាចឡើងប្រកួតបាន ២-៣ដង សន្សំលុយត្រៀមទុកសំរាលកូន។
កែវ រំចង់ ប្រាប់ឲ្យដឹងថា បច្ចុប្បន្ននេះភរិយារបស់ខ្លួនពពោះកំណើតកូនស្រីបានជាង៧ខែមក ហើយ បើគិតទៅអាចថា ប្រហែលជិត២ខែទៀតដល់ពេលសម្រាលផងដែរ។ ដោយបច្ចុប្បន្ននេះពេលសម្រាលម្ដងៗត្រូវការថវិកាច្រើនគួរសមដែរ ដូច្នេះត្រូវតែរកត្រៀមជាបណ្ដើរៗទម្រាំដល់ពេលនោះ។

អ្នកលេងគុនខ្មែររូបនេះបន្ថែមទៀតថា ឥលូវនេះការវិលចូលសង្វៀនជាថ្មីនេះ ក៏អាចជាការប្រកួតសន្សំលុយដើម្បីទុកឲ្យប្រពន្ធសម្រាលផង ព្រោះនៅពេលដែលប្រថុចញ៉ុច មិនដឹងជាទៅរកលុយឯណានោះទេដូច្នេះត្រូវត្រៀមមុន។ ទម្រាំដល់ពេលសម្រាលនោះ កីឡាករមានកេរ្តិ៍ឈ្មោះខាងលើថាអាចបាន២-៣ប្រកួតទៀតដែរ។

កែវ រំចង់ រៀបការជាមួយអ្នកស្រី ហម នីតា បានរយៈពេល៦ឆ្នាំមកហើយ ដោយមានកូនស្រីម្នាក់ឈ្មោះ កែវ ស្រីកា អាយុ ៥ឆ្នាំ និងបច្ចុប្បន្នភរិយាយរបស់ខ្លួនកំពុងពពោះកូនស្រីទី២ បានជាង៧ខែមកហើយ។ ប្រកួតចុងក្រោយកាលពីថ្ងៃអាទិត្យសប្ដាហ៍មុននេះនៅសង្វៀនបាយ័នស្ទឹងមានជ័យ អ្នកប្រដាល់តំណាងឲ្យកម្ពុជារូបនេះផ្ដួលថៃឲ្យសន្លប់ទឹកទី២៕